SA PERAULA

NARAT DEUS

NARAT DEUS: Deo soe cumpanzu istrintu de cuddu chi mi est fidele, de Cuddu chi happo giamadu cun predilezione manna. In Issu happo efusu s´Ispiridu meu faghindelu portadore de giustissia pro sos ateros. Issu no abboghinat, ne alziat sa ´oghe pro si fagher intendere in sas carrelas. No truncat una canna iscrannughida e no nde occhit su fogu chi sind´est morinde, (Is 42,1-3) NARAT DEUS: In sa die de s´abbundanzia S´immentrigat sa disfortuna E in sa die de sa disfortuna S´immentrigat s´allegria. S´ora de sa tristura faghet immentrigare su piaghere e sa fine de s´omine manifestat sas oberas suas. Prima de s´acabbu, no bantes a nissiunu, s´omine si biet su chi est in s´ultimu momentu de sa vida. (Qo 11,21-28) NARAT DEUS: Fizzu, si dezidis de serbire su Segnore No has a tenner sa fida fazile. Faghe a manera de tenner su coro tou nettu e fidele Pro no ti peldere in sos tempos diffiziles. Ista avvicinu a su Segnore In donzi momentu Pro essere accansadu cando t´has agattare disamparadu. (Qo 2,1-5) NARAT DEUS: Mi paret, o Deus meu, chi tue m´has ingannadu e deo mi sia lassadu ingannare. Soe una brulla dogni die, tottus si coglionan de me. Sa Peraula de su Segnore est pro me, dogni die, iscusia de coglionu e de brigonza. Happo nadu: non faeddo prusu in nomen de Deus. Ma, ea, in su coro, (polto) unu fogu mannu chi mi brusiat finas sos ossos: Happo chilcadu de no nde fagher contu ma mi soe consumadu in nd´una guerra manna. Ma su Segnore est cun megus e mi diffendet, chie mi pressighit non hat a tenner sa ´inchida. (Gr 20,7-12) NARAT DEUS: Tue, su teracu chi happo chilcadu, s´amigu meu chi soe andadu a leare in terra luntana e chi happo ticchiriadu dae attesu. Tue a su cales happo nadu: «tue ses su meu, t´happo criadu e no ti lasso disamparadu, no mi abbaides male ca soe deo su Deus tou». (Is 41,8-10) NARAT DEUS: Palti dae sa terra tua, palti dae sos parentes tuos, dae sa domo de babbu tou palti e bae a sa terra chi t´happo a mustrare. In ie t´happo a beneighire, su nomen tou happo a render connotu e has a esser benedissione pro tottus. Happo a beneighire cantos t´hant a beneighire. Ma chi t´hat a maleighire non hat a tenner paghe: tue has a esser su simbulu de sas famiglias de tottu su mundu. (Gn 12,1-3)